காதலும் மோதலும்..

(யூத்ஃபுல் விகடன் கவிதைகள் பகுதியில்)

நன்றி விகடன்.

கார்குழல் வகிடு கொஞ்சி
காற்பிறை நெற்றி கொஞ்சி

வில்லொத்த புருவம் கொஞ்சி
வீர வாள் மூக்கைக் கொஞ்சி

விரற்கடை கீழிறங்கி
வியர்த்த மேலுதடு கொஞ்சி

கருவிழி முத்தைக் காக்கும்
கவின்மிகு இமைகள் கொஞ்சி

சிவந்த உன் கன்னம் கொஞ்சி
சிரிக்கும் உதட்டோரம் கொஞ்சி

சங்குப் பூ காது கொஞ்சி
சங்கு போலுன் கழுத்தும் கொஞ்சி

துறுத்திய முகவாய் கொஞ்சி
துடிக்கும் கீழ் உதடும் கொஞ்சி

அணைத்து உன் அதரபானம்
ஆவலாய் உண்ணும்காலே

அமரனே வந்து நின்று
அமுதம் ஈந்திடினும் வேண்டேன்!

~~~~~~~~~~~~~~~~~~~~~~~~~~~~~~~~~~~~~

த‌னக்குள் எழும்
எண்ண அலைகளை
அடக்கித் தவித்து
முடியாமல்
வளர்த்துச் சீராட்டி
வார்த்தைக் குழந்தையாய்
பெற்றெடுத்து
பதிவுலகில் வளைய வரவிடும்
ஏகலைவர்களின்
கட்டைவிரல் திருடும்
துரோணர்கள்.