இரண்டாம் நிழல் -1

முன்னுரை

இரவுகள் அழகானவை.மெல்லச் சிரிக்கும் பெண்ணின் ஒளி வீசும் பற்களைப் போல...இரவுகள் அகோரமானவை...நீண்டு மறையும் பாம்பின் பிளவுண்ட நாக்குப் போல...வெளிச்சம் என்ற நிர்வாணத்தை மறைக்க இயற்கை அணிந்த உடை இரவு. கண்கள் பளபளக்க தலை குனிந்து இரை தேடி மிருகங்கள் வேட்டை செய்யும் இரவு.

இருள் சூழ்ந்த அந்த அறையில் கண்ணாடிக் கோப்பையின் உள்ளே ததும்பும் மதுவைப் போல மெல்லிய மஞ்சள் வெளிச்சம் சோகையாய் வழிந்து கொண்டிருக்க நீளமான அந்த மேஜையச் சுற்றிலும் போட்டிருந்த மூன்று நாற்காலிகளில் நட்டு வைத்த நடுகல்லைப் போல அந்த மூவரும் அமைதியாக உட்கார்ந்திருந்தார்கள். நாற்காலி இல்லாத நான்காம் பக்கத்தில் இருளுடன் கலக்க முயற்சித்து உறைந்தது போல அந்த ஃப்ளாட் ஸ்க்ரீன் டி.வி அவர்களைப் போலவே மெளனமாய் இருந்தது.

உறைந்து போன மெளனத்தை உடைக்க வெட்கப்படுவது போல நடுநாயகமாய் திரைக்கு எதிரில் அமர்ந்திருந்தவரின் சிகரெட்டால் கறுத்த அந்த உதடுகள் இரை தேடும் பாம்பு போல மெல்லிய குரலில் பேசியது.

“அந்தப் பிள்ள மேல தாண்டே எனக்கு சம்சயம். அவளாச் செய்யலன்னாலும் யாராச்சும் மிரட்டியிருப்பானுவளோன்னு நெனைக்கேன்...”

மற்ற இருவரும் ஆமோதிப்பது போல தலையசைத்தனர். நடுவிலிருந்த உருவம் ரிமோட்டை எடுத்து ஆன் செய்ததும் திரையில் படம் ஓடத்துவங்கியது. முடிந்ததும்...

“இதாண்டே நம்ம ப்ளான். இண்டைக்கே இத எக்ஸிக்யூட் செய்யணும். செரியா?”

"பெரிய விஷயமாருக்கு...மேல சொல்லணுமா..." தயக்கத்துடன் மற்றவர்களில் ஒருவன் இழுத்தான்...

"இல்லடே...மேல கொண்டு போக இன்னமும் பெரிசா வேணும். இப்ப கொண்டு போனா ‘ஒனக்கு இதே வேலையா போச்சுவே’ன்னு குப்பையில போட்ருவானுவ. அதுக்குத் தான் இந்த ப்ளான். முடிச்சிடுவிய இல்லியா..."

செஞ்சிடலாம் சார்...என்று அவன் இழுக்க, இழுக்காதடே...பொழுது சாயறதுக்குள்ள முடிச்சிட்டு நைட்டுக்குள்ள குறிச்சிக்குப்பம் வந்துடுங்க. நான் அங்கின வெயிட் பண்ணுதேன்...

அவர்கள் இருவரும் முகத்தை அழுந்த துடைத்து தலையாட்டி எழுந்து கொண்டார்கள். நீரில்லாத நதி போல அவர்கள் நகர்ந்து மறைய நடுநாயகமாய் இருந்த நபர் சிகரெட்டை பற்ற வைத்துக் கொண்டு மீண்டும் இருளை வெறிக்க ஆரம்பித்தார்.

=================

பாகம் -1

சென்னையின் சமீபத்திய பிரபலமான மல்டிப்ளக்ஸ் அது. தியேட்டர்களினிடையே கடையா, கடைகளினிடையே தியேட்டர்களா என்று பட்டிமன்றம் ரேஞ்சுக்கு குழப்படியான ஒரு அமைப்பு. காசு செலவில்லாமல் ஏசி குளிர்ச்சியில் எக்ஸிபிஷன் மாதிரி பொழுதைக் கழிக்க வரும் கூட்டம், பீட்டரில் கலாய்க்கும் மாணவிகள்,  கிறங்கிப் பின்னாடி திரியும் மாணவர்கள் என்று பரபரப்பான சூழல். 

பார்க்கிங் லாட்டின் நுழைவில் சர்ரென வந்து நின்ற ஸ்கோடாவை கண்டதும், ஓடி வந்தார் வாலட் மாணிக்கம். ஒரு சல்யூட் வைத்து, கார் கதவை திறந்து விட்டு,  “வாங்கம்மா, நல்லாருக்கீங்களா? அய்யா வரலைங்களா?” என்றார். ஒரு மேஜிக் மாதிரி, திறந்த காருள்ளிருந்து, லோ வெயிஸ்ட் லீவையும், கருப்பு டீ ஷர்ட்டும் அணிந்து, ஷாம்பூ விளம்பரம் மாதிரி ஒரு தலையசைப்பில் கூந்தலை பின்னுக்குத் தள்ளி, “ஹை ஓல்ட் மேன்” என்று அவரை மாதிரியே சல்யூட் அடித்து சிரித்து,  “வருவாங்க! முன்னாடியே பார்க் பண்ணுங்க மாணிக்கம்” என்று, சாவியும், நூறு ரூபாயும் திணித்துவிட்டு காத்திருந்தாள் ஸ்ருஷ்டி.

ஸ்ருஷ்டி! இருபத்தாறு வயது! இதோ நடந்து கடப்பவர்கள் அந்த நடிகை இந்த நடிகை என அனுமானிப்பதும்,. பார்க்கிங்குக்கு வந்த கார்கள் நகர மறுப்பதற்கும் காரணமானவள். தொழிலதிபர் ஸ்ரீதரனின் ஒரே வாரிசு. ஒரு வருஷம் ஆத்லடிக் என்றும் மறு வருடம் டென்னிஸ் என்றும், “ஐ லவ் பரத நாட்டியம் அப்பா” என்றும் அலக்கழித்தவள் M.B.A. முடித்து வந்ததும், பெருமையாக, தன் கம்பெனியில் சேர அழைப்பு விடுத்தவரை, “சாரி டாட்! ஐ வுட் ராதர் டேக் ஓவர் யுவர் பிஸினஸ்” என்று தனியே தொழில் தொடங்கியவள். 

ஓட்டமும் நடையுமாக வந்து, சாவியைக் கொடுத்த மாணிக்கத்துக்கு நன்றி சொல்லி, செல்லை எடுத்து ஒற்றி, “யோவ்! இன்னா? கிளம்பியாச்சா?” என்றாள்.  “க்கே! ஜஸ்ட் டைம் ஃபார் அ கப்பூச்சினோ! லேட் பண்ணா போயிண்டே இருப்பேன். ஒன் வீக் சாவடிப்பேன்” என்று சிரித்து காஃபி ஷாப் நோக்கி நகர்ந்தாள்.

“ராட்சசி!” என்றபடி, முகம் கழுவி கிளம்ப தயாரானான் ப்ரஸன்னா. அஸிஸ்டண்ட் கமிஷனர் ஆஃப் போலீஸ். சரியாக, அந்த நேரம் கமிஷனரின் கால். “ப்ரஸன்னா! வில் யூ ப்ளீஸ் கம் ஃபார் அ மொமெண்ட்” என்றதும், போச்சுடா என்று நினைத்தபடி கமிஷனரின் அறைக்கு நடந்தான்.

“உட்கார் ப்ரஸன்னா. ஐ வோண்ட் டேக் மச் ஆஃப் யுவர் டைம். ஐ.ஜி. வாண்ட் யூ ஃபார் அ ஸ்பெஷல் டாஸ்க். நாளைக்கு காலைல 6க்கு மெரினால மீட் பண்ணனுமாம். கிவ் அ கால் அரவுண்ட் 8 இன் த ஈவினிங். பெஸ்ட் ஆஃப் லக்!” என்று கை கொடுத்தார். 

வெளியே வந்து, முகம் கழுவி, தயாராகி, ட்ரைவரை தயாராக இருக்கச் சொல்லி ஆர்டர்லிக்கு சொல்லிவிட்டு, ஸ்ருஷ்டிக்கு கால் செய்தான். “கிளம்பிட்டேன் டியர்! டென் மினிட்ஸ்ல வந்துர்ரேன்” என்று கிளம்பி, வெளியே வந்தான். போர்டிகோவில் நின்ற காரில் ஏறி, மல்டிப்ளக்ஸில் ட்ராப் பண்ணிட்டு நீங்க போலாம், ராஜன் என்றான். 

டைம் பார்த்தபடி, கப்பூச்சினோ உறிவதும், சுற்றிலும் இருப்பவர்களைப் பார்ப்பதும், இவள் பார்ப்பது தெரிந்ததும், சட்டென கண்ணைத் திருப்புபவர்களை ரசிப்பதுமாய் இருந்தாள் ஸ்ருஷ்டி. 

கார் கமிஷனர் அலுவலகத்தை விட்டு கிளம்பி வீதியில் இறங்கும் தருவாயில், வேகமாக வந்த ஒரு ஃபோர்ட், சடாரெனத் திரும்பி வழிமறித்து, முன்னால் சென்ற ஒரு ஆட்டோவில் மோதியது. கண்ணிமைக்கும் நேரத்தில் ஹார்ன்கள் அலற ட்ராஃபிக் ஜாம். 

டிரைவர் ராஜன், கத்த, செண்ட்ரி ஓடி, வழி ஒழுங்கு படுத்த முயன்று, திரும்ப ஓடி வந்து, ஆட்டோக்கு நல்ல அடி சார். சண்டை போடுறாங்க என்று திரும்ப ஓடினான். ஏஸியின் கார் நிற்பது கண்டு மற்ற செண்ட்ரிக்கள், போலிஸ் என்று ஓடி வந்தனர். ப்ரஸன்னாவும் காரை விட்டிறங்கி, ஆக்ஸிடண்ட் ஆன இடத்துக்கு விரைந்தான். 

பத்து நிமிடங்கள் பறந்துவிட்டிருந்தன. ஸ்ருஷ்டி பொறுமையிழந்தாள். “சாவு இடியட்” என்று கிளம்பினாள். ஒரு முறை அழைத்தாள். காரில் விட்டுப் போயிருந்த செல் அடிப்பது, ஹாரன் சத்தத்தில் கேட்காமல் போனது. ‘ஆஸ் ஹோல்’ என்று திட்டியபடி, செல்லை ம்யூட் செய்து, பையில் போட்டு பார்க்கிங் லாட்டுக்கு விரைந்தாள். 

மாணிக்கத்தைக் காணவில்லை. கட்டைத் தடியனாக ஒரு வாலட் ஓடி வந்து, மாணிக்கம் சாப்பிட போயிருக்காரும்மா. சாவி கொடுங்க நான் எடுத்துட்டு வரேன் என்று சாவி வாங்கிப் போனான். 

“சை! ஐ டோல்ட் ஹிம்! ஃபுல்டே லீவ் போடு. ஆஃபீஸ் போனா ஸ்பாயில் ஆயிடும்னு. இடியட்!’ என்றபடி நின்றவளின் அருகில் வந்து நின்றது கார். கதவைத் திறந்து இறங்கியவன், அவள் ஏறியதும் கதவை மூடி சல்யூட் அடித்தான். விருட்டென்று காரைக் கிளப்பி வெளியில் வரும்போது ரியர்வ்யூவில் ஒரு உருவம் அசைவதும், காதுக்கு அருகே சில்லென்று ஒரு உணர்வும், டேக் லெஃப்ட் அண்ட் ட்ரைவ் நார்மலியும் கேட்டது. 

ட்ராஃபிக் ஜாம் ஒருவாறு சரியாக, திரும்ப காரில் ஏறிய ப்ரஸன்னா மிஸ்ட் கால் பார்த்து கால் செய்தான். ஸ்விட்ச்ட் ஆஃப் என்று வந்த மெசேஜை வெறுத்து, சீக்கிரம் மல்டிப்ளக்ஸ் ரோடில் விடு என்றான்.

தொடரும்...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

இந்தக் கதை சில பதிவர்கள் சேர்ந்து எழுதியது. கீழ்க்கண்ட பதிவர்களில் யார் இந்தப் பகுதியை எழுதியது என்பதை மறக்காமல் கதை குறித்த பின்னூட்டத்துடன் குறிப்பிடவும்.

1. அது சரி 2. முகிலன் 3. கதிர் 4. வானம்பாடிகள் 5.கலகலப்ரியா 6.பிரபாகர் 7. நசரேயன்.8.பலா பட்டரை ஷங்கர்

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
டிஸ்கி: மாங்கு மாங்குன்னு உக்காந்து கதையப் போட்டா அத பத்தி சொல்லாம ஒத்தையா ரெட்டையா புடிக்கிறீங்களா? அவ்வ்வ்வ்.