ஏக்கம்..

பெட்டைக் குயிலோசைக்கு

எசபாட்டாய் ஒற்றைக் குயிலோசை
மரங்களெல்லாம் தாண்டி
மனம் மாற்றிக் கொண்டன..

ஏனோ இப்போதெல்லாம்
ஒற்றைக் குயிலின்
உரத்த ஓசையில்
மற்றக் குயில் அடங்கியே போகிறது

எப்போதேனும்
சேர்ந்து கூவிடினும்
சுருதி ஏனோ
பேதமாகவே ஒலிக்கிறது!

~~~~~~~~~~~~~~~~~~~~~~~~~~~~

தனிமையும் தவிப்பும் மட்டுமே
துணையான நாட்கள் அவை

கருவேம்புக் கஷாயம்
கால்கடுக்க நடைப் பிரதட்சணம்
கண்ணன் கோவிலில் தொட்டில்
கடும் விரதம் பல நாள்

மாரியாத்தா கோவிலில் மண்சோறு
மலையேறி முருகனிடம் மடிப்பிச்சை
மாதம் தவறாமல் செக்கப்பும் மருந்தும்
மலடி என்றதோர் அடைமொழியும் கூட

மருந்து பலித்ததோ
மாயம் நிகழ்ந்ததோ
அவள் மலர்ந்தாள்
அவளும் மலர்ந்தாள்

அம்மா பாரும்மாவும்
அண்ணா அடிச்சிட்டாம்மாவும்
அலுத்துப் போன ஒரு நாளில்
அனிச்சையாய் சொடுக்கியது நாக்கு

இந்தச் சனியனுங்க தொல்லையில்லாம
எங்கயாவது தனியா நிம்மதியா தொலையணும்!

இனிய பொங்கல் வாழ்த்துகள்.