கூசித்தான் போகிறது...

உப்புக் குறைவென்று
உதைத்துவிட்டுப் போனவன்
ஊரடங்கிய பின் உறவுக்காய்
உள்ளங்கால் சுரண்டிச் செல்கையில்..

அக்குளில் பிரிந்த தையல் மறந்து
அரசுப் பேருந்தில் கையுயர்த்திப் பிடிக்கையில்..
மகளின் சடங்குக்கு மாதச்சீட்டு சேர்ந்து
தவணை தவறித் தவிக்கும் தருணங்களில்..

உழைத்துக் களைத்துத் திரும்புகையில்
உறங்கித் தொலைத்து
ஒதுங்கிய முந்தானையூடுருவிய
ஓரப் பார்வைகளின் குறுகுறுப்பில்..

உறவுகளைத் தொலைத்த திருமணம்
என்றறியாமல், ஊருக்குப் போக
அடம் பிடிக்கும் குழந்தைகளின்
உற்சாகக் குமிழை உடைத்தெறிகையில்..

உப்பு வாங்கவும் வழியற்ற
ஓர் மாதக் கடைசி ஞாயிறில்
உணவு வேளையில் வந்த தோழியை
உபசரிக்கவியலாத் தருணங்களில்..