கேரக்டர் - சுந்தரம்

இந்த டாய்லட்ல ஆம்பிளைங்கன்னு அடையாளத்துக்கு ஒரு உருவம் போட்டிருக்கும் பார்த்திருப்பீங்களே. வெறப்பா தோளும் கையுமா.அப்புடி ஒரு உருவம் நெசமாவே நடந்து வந்தா எப்படியிருக்கும்? அதும் ஒரு லயமா தோளக் குலுக்கி, தலைய வெட்டி, கோழி நடக்குறப்ப கழுத்து முன்னுக்கும் பின்னுக்கும் போகுமே அப்புடி ஒரு வெட்டு, க்கும்னு ஒரு சவுண்டுனு நடப்பாரு. இவருதாங்க நம்ம சுந்தரம்.

அஞ்சடி ரெண்டங்குலம் இருப்பாரு. சம்மந்தமே இல்லாம அகலமான முதுகு, நீளமா கையி. சிவப்புன்னு சொல்லுற நிறம். மொத மொத அவர பார்த்ததே டாய்லட்ல. இருக்குறது ரண்டு வாஷ் பேசின், ஒன்னுல குழாயில்ல, இருந்த ஒன்ன முழுசா தொறந்தாரு. வெயிட் லிஃப்டர் ஒரு பந்தாவா குனிஞ்சி பின்னாடி ஆட்டி ஆட்டி கம்பிய புடிச்சிகிட்டு தலைய தூக்கி பார்ப்பாரே. அப்புடி இவரும் சாவதானமா அட்ஜஸ்ட் பண்ணி நின்னு கன்னாடி பார்த்தாரு. வலப்பக்கம், இடப்பக்கம், கொஞ்சமா குனிஞ்சி, அப்புறம் மேலாலன்னு பார்த்தாரு.

பாக்கட்டுள்ள கடுதாசில மடிச்ச ஒரு சாம்பிள் சோப் எடுத்து செட் பண்ணாரு. நாறுனாலும் பரவால்லடே! என்னா ப்ளானுன்னு பார்க்காம போறதில்லைன்னு நின்னுட்டேன். ஒரு பத்து நிமிஷம் முகத்த கழுவறதும், சோப்பு அப்புறதும் திரும்ப கழுவறதும்னு போச்சு. கைக்குட்டைய எடுத்து முகம் தொடைச்சாரு. சரி முடிச்சிட்டாருன்னு நான் ரெடியானேன். பின்னாடி கைய விட்டு சீப்பு எடுத்தாரு. கழுவுனாரு. திருப்பி கழுவினாரு. உதறினாரு. திரும்ப கழுவினாரு. கர்சீப்ல துடைச்சாரு. தலைய சீவோ சீவுன்னு சீவினாரு.

திரும்ப கழுவி, திரும்ப உதறி ஒரு வழியா பாக்கட்டுக்குள்ள அனுப்புனாரு. அப்பாடா முடிச்சான்னு நினைச்சேன். ம்ஹூம். சோப்ப எடுத்து உதறி, அதே வெண்ணெய் பேப்பர்ல மடிச்சி பாக்கட்டுள்ள போட்டாரு. கை கழுவினாரு. உதறினாரு. ஸ்ஸ்ஸ்ஸ்ஸ்ஸப்பா. ஆச்சுடான்னு நினைச்சேன். ம்ஹூம். திரும்ப குழாய் கீழ கைய வெச்சு கட்டை விரல் நகத்தால மத்த விரல் நகம், மத்த விரல் நகத்தால கட்டை விரல் நகம்னு கழுவினாரு.

மொத்தமா ஒரு 20 நிமிசம் போயிருக்கும். பிரிய மனமில்லாம கண்ணாடிய பார்த்தபடியே போனாரு. யாருன்னு பார்த்தா புதுசா வேலைக்கு சேர்ந்திருக்கிறாருன்னாங்க. பயபுள்ளைக்கு ஏதோ ஃபோபியா போலயே. ஆளு ராசா மாதிரி இருக்கானேன்னு நினைச்சிட்டே வேலைய பார்க்க போனேன்.

மதியம் சாப்பாட்டுக்கு கை கழுவ போனா ஒரு ரகளையே நடக்குது. ஒரு பத்து பேருகிட்ட சாப்பாட்டு டப்பா, கை கழுவ நின்னுட்டிருக்க நம்ம ஐய்யா நகம் கழுவிட்டிருக்காரு. யாரு சொன்னாலும் சட்ட பண்ணல. பதில் சொன்னா சண்ட போடலாம். ஒன்னுமே பேசாம நடத்திட்டிருக்கிறவன என்ன பண்ண?

அப்புறம் ஐய்யா இருந்தா வேற குழாய் தேடி போக ஆரம்பிச்சிட்டாங்க. ஊட்டுல பெருசுங்க இருக்கே. புள்ள இப்புடி இருக்கானேன்னு பார்க்கமாட்டாங்க? அத உட்டு போட்டு ஒரு ஏமாளிப் பொண்ண புடிச்சி கட்டிவச்சிட்டாங்க. பயபுள்ள இன்னும் பாலிஷ், இன்னும் பளபளன்னு ஆய்ட்டாரு. ஒரு நாள் ஆபீஸ் வந்தவரு கையெழுத்தும் போட்டுட்டு பாலீஷ் பண்ண போனாரு. ரொம்ப கோவமா அதிகாரிட்ட வந்து எனக்கு லீவ் வேணும்னாரு.

என்ன அர்ஜண்ட்? கையெழுத்து போட்டாச்சில்ல. மதியமா போ அரை நாள் லீவ் போட்டுன்னா, கோவமா இல்ல நான் போணும்னு அடம் புடிச்சாரு. என்னய்யா அப்புடி அவசரம்? வேலைய பாருன்னாங்க. இல்ல எம் பொண்டாட்டி பனியனுக்குள்ள மிளகாய்த்தூள் கொட்டி வச்சிட்டா. அவங்க அப்பன் ஊட்டுக்கு கூட்டிட்டு போய் நாயம் கேக்கணும்னு பிடிவாதம் புடிச்சாரு.

ஒழிஞ்சி போன்னு அனுப்பி விட்டாங்க. போனவன் ரெண்டு நாள் கழிச்சி வந்தான் இளிச்சிகிட்டே. என்ன நடந்துச்சின்னா அன்னைக்கு வெள்ளிக்கிழமை. அந்தம்மா குளிச்சி முடிச்சி சமைச்சிட்டிருக்க அய்யா குளிச்சிட்டு ட்ரெஸ் பண்ணிட்டிருக்காரு. தலை சரியா துவட்டலைன்னு தங்கமணி சொல்லிச்சாம். துவட்டிவிடுன்னு வழிஞ்சதுல பனியன்ல அந்தம்மா பூசியிருந்த மஞ்சள் அப்பியிருக்கும் போல. ஆபீஸ் கிளம்பி வர, வியர்வைல நனைஞ்சி  பனியன்ல சரியா அலசாத சோப்பும் மஞ்சளும் சேர்ந்து சிவப்பா தெரிஞ்சது போல.

இவரு லீவ் போட்டு வீட்ல போய் என்ன ஏதுன்னே கேக்காம ரெண்டு அப்பு அப்பி, பஸ் புடிச்சி மாமனார் ஊருக்கு இழுத்துட்டு போக சாயுங்காலம் ஆகிப்போச்சி. அழுது வீங்கின முகமும், அசுர பார்வையில மாப்பிள்ளையும் பார்த்து அரண்டு போய்ட்டாங்களாம். இவரு பராசக்தி ரேஞ்சுக்கு வசனம் பேசி, அனுமார் மாரைப் பிளந்து உள்ள சீதா ராமனைக் காட்டினா மாதிரி சட்டையை பட்டன் தெறிக்க பிச்சி காட்டினா மஞ்ச மஞ்சளா இருக்கு.

மாமனார் தலையில அடிச்சிகிட்டு, மாக்கான்னாலும் மாப்பிள்ளையாச்சேன்னு விருந்து போட்டு அனுப்பியிருக்காரு. ஹி ஹி. நாந்தான் தப்பா நினைச்சிட்டேன்னு வந்து எல்லார்ட்டையும் வழிஞ்சாரு. கடவுள் ஏங்கறவங்களுக்கு குழந்தையில்லாம சாவடிக்கறதும், இந்த மாதிரி ஏப்பராசிங்களுக்கு இந்தா புடின்னு கொடுக்கறதும் சகஜம்தானே. குழந்தை பிறந்துச்சி. ஆம்பிள்ளை சிங்கம்னு போய் பார்த்துட்டு வந்து, லீவ் போட்டு பேரு வைக்க, புண்ணியா வசனம்னு போனாரு.

போய் பார்த்தா பழைய சீலைய தூளியா கட்டி போட்டிருந்தாங்களாம். அப்புடித்தான் எல்லா வீட்டிலையும் நடக்கும், தொட்டில் இல்லைன்னா. பார்த்த மாத்திரத்துல இவருக்கு வந்திச்சி கோவம். விசுக்குன்னு கடைவீதிக்கு போய் காடாத்துணி வாங்கிட்டு வீட்டுக்குள்ள வந்து, எம்புள்ளைய பழைய சீலையில போடுவியா? இந்தா புதுத்துணி.  இதுல போடுன்னு தகறாரு. பண்ணியிருக்காரு. அவங்க பதறிப்போய், அடக் கடவுளே பொறந்த குழந்தைக்கு புது காடா துணில தொட்டில் போடக்கூடாதுப்பான்னா மாமனார ஒரு அப்பு, பொண்டாட்டிய ஒரு அப்புன்னு அப்பி, அப்புறம் அங்க இருந்தவங்க புடிச்சி உலுக்கி, பன்னாடையே, இறந்து போன குழந்தையதாண்டா அப்புடி தூளிமாதிரி கட்டி கொண்டு போவாங்கன்னு சொன்னா அப்புறம் புரிஞ்சது அய்யாக்கு.

தங்கமணி புள்ளைய பாப்பாளா இந்த புண்ணாக்க பாப்பாளா? தன்னை கவனிக்கறதே இல்லைன்னு ஒரு மனக் குறை. அது வியாதியாகி சண்டை. எங்க தன்னோட சண்டை போட்டு கோவத்துல புள்ளைய கொன்னுடுவாளோன்னு சந்தேகம். வேலைக்கு கிளம்பறது சர்ப்ரைஸா போய் செக் பண்றது. லீவ் போட்டு போய் செக் பண்றதுன்னு வங்கொடுமையாகிப் போச்சு. அப்பவும் யாருக்கும் இவன டாக்டர் கிட்ட கொண்டு போகணும்னு தோணலை.

ஆஃபீஸ்லயும் காலைல வருவாரு. கோல்ஃப் ப்ளேயர் குழிகிட்ட பால் நின்னா சுத்தி சுத்தி குறி பார்க்குறா மாதிரி டேபிளை சுத்தி சுத்தி வச்சிட்டு போனது அப்புடியே இருக்கான்னு பார்ப்பாரு. அரை மணிநேரம் இப்படிப் போகும். அப்புறம் சமாதானமாகி, எல்லாம் எண்ணி சரி பார்த்து, காஃபி வர குடிச்சிட்டு தூங்கிடுவாரு. பன்னிரண்டரைக்கு எழுந்து முகம் கழுவிட்டு சாப்பிட்டு வந்து அரட்டை அடிச்சி, ரெண்டு ரெண்டரைக்கு டீ வர குடிச்சிட்டு தூங்கிடுவாரு.

நாலரை மணிக்கு எழுந்து முகம் கழுவி, ஃபைலெல்லாம் அடுக்கி, திரும்ப கோல்ஃப் ப்ளேயர் மாதிரி சர்வே பார்த்துட்டு வீட்டுக்கு கிளம்பிடுவாரு. என்ன ? வேலையெல்லாம் அப்படியே நிக்குது? இப்படியெல்லாம் தூங்கக்கூடாதுன்னா, ஒரு மாதிரி சிரிச்சபடி வைஃப் மருந்து வச்சிட்டா. அது ரொம்ப பவர்ஃபுல்லா இருக்கும்போது மயக்கமா இருக்குன்னு சொல்லுவாரு.

ஹி ஹி. இப்புடியே கிட்ட கிட்ட அதே சீட்ல 15 வருஷம் ஓட்டிட்டாருங்கோவ். இவரு கொடுமை தாளாம பொண்டாட்டி டைவர்ஸ் பண்ணிடிச்சி. இப்பவும் வீட்டுல இருக்கிறவங்க இவருக்கு ஒரு வைத்தியம் பார்க்கலாம்னு நினைக்கல போல. எவ்வளவு சுத்தமா கழுவிட்டிருந்தாரோ இப்போ நேர் மாறா, குளிக்காம, சில நேரம் பத்து நாள் ஒரே ட்ரெஸ்ஸோடன்னு வராரு. தூங்குறாரு. சில நேரம் ஏதோ ஒன்னு ரெண்டு வேல குடுத்தா பார்ப்பாரு.

என்னத்த சொல்ல? சில நேரம் பாவமா இருக்கும். டாக்டர பாருப்பான்னு ஒரு வாட்டி ஆலோசனை சொன்னேன். நான் என்ன மெண்டலா சார்னாரு. இல்லப்பா நாந்தான்னு விட்டுட்டேன்.