அப்பாக்கள் எப்போதும் மாறுவதேயில்லை

பத்து வயதில்
வீதியிலிருந்து எடுத்து வந்த
நாய்க்குட்டியை
அருவெறுத்து விரட்டி
கடன் வாங்கி
ஐந்நூறு ரூபாய்க்கு பாமரேனியன்
வாங்கிக் கொடுத்த அப்பா..
பத்து வருடம் கழிந்தும்
என் காதல் வெறுத்து
கடன் வாங்கி கட்டி வைக்க
அவசரமாய் மாப்பிள்ளை தேடுகிறார்..

அப்பாக்கள் எப்போதும் மாறுவதேயில்லை.
~~~~~~~~~~~~~~~~~~~~~~~~~~~~~~~~~~~~~~~~~~
சயன்ஸ் பிடிக்கவில்லை
சங்கீதம் படிக்க விருப்பமென்றேன்
கடற்கரையில் துண்டு விரித்து
பிழைக்கவா?
கணிணி படி என்றார் அப்பா!
படித்துப் பின் வேலை
கிடைத்துப் பின்
கழித்துக் கட்டிய ஓர் நாளில்
கவலை மறக்க கடற்கரை சென்றேன்
ஆர்மோனியம் வாசிப்பவன்
துண்டு நிறைய காசு

அப்பாக்கள் எப்போதும் மாறுவதேயில்லை.